Nor-nai, lehen euskal emakume ilustratzaile profesionala

Banan-banan sailean ondo merezitako lekua egiten diogu Ignazia Zabalo ilustratzaileari:

Euskal Herrian izandako lehen emakume marrazkilari profesionala Ignazia Zabalo Ballarin izan zen, eta baita bere lanak sinatzeko ausardia izan zuen lehenen emakumea ere,  Argiaren 1925. urteko egutegian  azaldu zen bere sinadura aurreneko aldiz.

20 urterekin hasi zen John Zabalo “Txiki” bere nebarekin lanean eta  bere irudiak urte askotan Txikirenak zirela pentsatu zen. 1973an, adibidez, Anton Maria Labaienek idatzitako “Txiki, marrazkilari eta umoredun” liburuan nahasian agertzen ziren “Nor-Nai”ren eta Txikiren marrazkiak.

1931. urtean Bartzelonara joan  eta han bere ibilbide profesionala bere kasa jarraitu zuen. Ignaziak Katalunian eman zuen garaietako informazio askorik ez daukagu, baina bai zortzi urtez  bertako grafikagintzan lanean iardun zuela badakigu, hori adierazten dute behintzat , sarean barreiaturik aurkitu ditugun berriek.   Horrela, seguru gaude, irudian eta aurreko loturan aipatu dugun “Sillabari Cami” liburua lan zabalago baten aztarna baino ez dela izango. Bere ibilbidea baina, handik gutxira moztu zen, 1939. urtean frankotarren bonbardaketa batek heriotza eragin zionean Bartzelonako etxeko atarian.

KMK lehiaketan sari partekatua

Noticias Taldeak eta Rekalde Aretoak antolatzen duten KMK lehiaketaren hirugarren edizioa lehen aldiz partekatua izan du saria (1.500 eurotakoa) bi komikigileen artean. Jon Mikel Udakiolari (Hernani, 1965) eta Piedad Ortiz de Urbinari (Barakaldo, 1973) egokitu zaie exaequo saria, Txorimaloa eta Maitasun gozoa komikiengatik. Adur Larrea eta Pernan Goñi marrazkilari eta komikigileek osatu dute epaimahaia, “eta buelta asko eman ondoren, bioi ematea erabaki dugu” azaldu dute Noticias taldeko egunkariek argitaratutako berrian.  “Bi lanak oso onak iruditu zaizkigu, eta buelta asko eman ondoren, bioi ematea erabaki dugu”, azaldu du Goñik.

Irabazleen ibilbideari erreparatuz, Ion Mikelen lan artistikoak bere blogean du erakustoki txiki bat. Bertan azaldutakoaren arabera, artearen alde ezberdinak jorratu ditu bere ibilbide luzean (argazkigintza, animazioa etab.)

Piedad Ortiz de Urbina barakaldoarra da eta bere bi ahizpak bezala ilustratzailea. 2011an “Historias de un cangrejo siamés” argitaratu zuen, testua eta ilustrazioa uztartzen zituen ipuin laburren bilduma . Bere blogean agertzen duenez bere asmo nagusia gaur bere lanentzako argitaratzailea bilatzea da. Helburu hori lortzeko bidean irabazi duen saria aurrerapausu bikaina izan daiteke.

Zorionak biei!

Patxi Huarte komikigileak «De Rerum natura 5» kaleratu du

“De Rerum natura 5. noizko?” galdetzen genion geure buruari maiatzean argitaratutako postean. Orain arte, Elkarrek urte birik behin argitaratu izan ditu Patxiren zintak eta azkena 2011an argitaratua izan zela kontuan izanda, Gorbeako artzaiaren zehaztasunez ale berria aurten argitaratu behar zela iragarri genuen. Eta bete-betean asmatu dugu.

Noticias de Guipuzkoa egunkaritik  hartzen dugu berria, modu zabalenean berak eman baitu albistea.

“Ziur asko, Finlandian biziko banintz zinta poetikoago eta malenkoniatsuagoak egingo nituzke, askoz ere lilagoak. Baina aspergarriagoak ere izango ziren”azaltzen du Zaldieroak albistean. Hala ere, egunero bere  zintak Berria egunkarian irakurtzen dugunok badakigu, umore finaz eta zuhurraz onduak izateaz aparte, zinta hauek sarri puntu poetiko bat ere badutela. Behintzat guri hala iruditzen zaigu. 

Argazkia gorago aipatu dugun artikulutik jasoa

 © Ruben Plaza / Diario de Noticias

Saba eta landare magikoa

Ttarttalo argitaletxeak “Saba et la plante magique”  Yann Degruel egile frantziarraren komikia euskaratu eta argitaratu berri du. “Saba eta landare magikoa” “Kafearen deskubrimenduari buruzko kondaira eder batean oinarritutako komiki bikaina da” azaltzen du euskal argitaletxeak bere web-orrian. 32 orrialdeko komikia 3 eta 7 urteko umeei zuzenduta egon arren, artista onen lanez gozatzeko ez dago adin mugarik. 

Ternuatik komiki berri bat

Baleen koipea egosteko labetik aterata bezala, bero-bero dago oraindik “Joanes or the Basque Whaler” komiki seriearen hirugarren atala, aurreko biak bezala ingelesez hau ere. Berarekin itxiko da New Yorken euskal gai bati buruz egin den aurreneko eleberri grafikoaren trilogia. Nevadako Unibertsitateak eta Center for basque studies-ek argitaratu duten hirugarren alea “Priest of Pirates”  du izenburua. Komikeriko orriotara dakargu, laster euskaraz argitaratuko duten zurrumurrua entzun baitugu. Izan ere, Guillermok bere gidoiak euskaraz idatzi eta ostera ingelesera itzultzen ditu.

Guillermo Zubiaga marrazkilari bizkaitarra da Joanes pertsonaiaren  sortzailea eta trebeki marraztutako orriotan barrena Ternuako XVI. mendeko bale arrantza mundura eramango du irakurlea. Bere ustez “AEBetan cowboy–ak dituzten bezala, Eskandinavian bikingoak eta Japonian samuraiak, guk balea arrantzaleak ditugu. Baliokideak dira nire ustez”.

Guillermo Zubiaga Barakaldon sortu baina Laukizen bizi izan zen 5 urtetik aurrera.  Arte Ederrak eta Artearen Historia ikasketak New Yorkeko  Syracuseko Unibertsitatean burutu zituelarik. Hiri horretan bizi da gaur, familiarekin eta bere lanbide nagusia Marvel etxearentzat egiten du. Hala ere, bere sustraiak ezin ahaztu, eta laster euskaraz gozatu ahal izango dugun itxura ederreko trilogia berri honekin izango dugu gure artean.