“Globhito” boletinaren zenbaki berria

Ondarroako Luterl taldearen berripapera, Globhito, bere 22. zenbakia kaleratu berri du. Gogoratu dezagun, Globhito, Globho fanzinaren “seme bastardoa” zen, Ioniñaki Luterl taldeko kide beteranoaren iritziz. Helburua Ondarroako herrian sortzen ziran  komikigintzaren inguruko dinamiken berri ematea.  Komikia eman ta zabaldu!

Horrela makina bat urtez ibili da Luterl taldea, eta azken Globhitoa irakurriz aurrerantzean ere komiki harrobi zabala Ondarroan ez dela faltako suposatzen dugu. Kaiet Bengoetxeak zuzendutako komiki tailerretan berrehun ikasletik gora pasatu dira. 2001ean hasi zen Zaldupe eta institutuan, eta 2002an Zubi Zaharrean. Ordutik hona horretan darrai. Ondarroako gazteen artean, azaltzen du Kaietek,  ez da komikizaletasunik falta “gaur Manga eramaten da asko. Gainera neskek Manga komikiak asko irakurtzen dituzte, eta bertako pertsonaien istorioak eta jarraitzen dituzte. Eta mutilek Manga ere, baina gero bakoitzek bere gustoko beste komikiak ere irakurtzen dituzte, batzuk Mortadelo edo beste batzuk igual… Gore… bakoitzak adar batetik jotzen du” .

Marraztuz, irakurriz, gozatuz, azken finean, Komiki Kultura  bizi-bizirik  dagoen artea da kostaldeko herri jator honetan.

Komiki tailerren erakusketa zabalik Ondarroan

Ikasturtean zehar ikasleek komiki eta marrazketa tailerretan egindako irudiak  jarriko dituzte erakusgai Ondarroako udal erakusketa aretoan. Erakusketa maiatzaren 24tik ekainaren 2ra iraungo du.
Erakusketaz aparte, Komikia, zer da? solasaldi marraztua izan zen pasa den maiatzaren 26an. Dani Fano, Xabiroi aldizkariko kidea izan zen “solasaldi marraztua” izeneko aktibitatearen arduraduna.

Hemen duzue gure Ondarroako kontaktuak bidalitako  “solasaldi marraztuaren” irudi  bat.

“De rerum natura 5″… noizko?

Ezaguna komizale eta horren komizale ez direnen artean, Komikerin gaur banan-banan autoreen atalera dakargu Patxi Huarte “Zaldieroa”  napar egilea.

Berria, Nabarra, Aizu!,  Xabiroi, Karrika eta Deia aldizkarietan barreiaturik ikus daitezke bere lanak. Baina ospearen parte nagusia Berria egunkarian De rerum natura izeneko komiki zintei zor dio.  2005etik hona  urte biro bere komiki-zinten  antologiak argiratzen ditu Elkarrek. Azkena 2011 urtean argitaratu bazen… agian aurten… berria ikusiko ote dugu?

 
irudiak © zaldieroa

Aitor Oñederrak jaso du Euskal Herriko Animazio saria

Euskal Herriko Animazio Saria irabazi berri du Aitor Oñederrak (Deba, 1983) Gariren azken diskoko ‘Dena eta ezer ez dago’ bideoklipari esker. Bideoa ikusi eta ondo igartzen da Aitorrek ilustrazio eta komikirako duen joera eta zaletasuna, eskuz egindako marrazkia, hau da komikia baita bideokliparen oinarria. “Beti pentsatu izan nuen nire marrazki haiei bizia eman nahi niela, paperean ageri ziren marrazkiak mugimenduan jarri nahi nituela” azaldu du larunbat honetako Ortzadar gehigarrian.

“Dena eta ezer ez dago” “Ez da Amaiera” lanetik  irtendako abestia da. Guztira hamaika kanta berri aurkezten ditu Legazpiarrak bere zazpigarren diskoan.

Rekalde-Ortzadar lehiaketaren edizio berria

Aurten  beteko du DEIA egunkariak eta Rekalde Aretoaren artean antolatzen den Rekalde-Ortzadar Komiki Lehiaketak bere III. edizioa. Komiki txapelketa honek bere garrantsia lortu du euskarazko komikigintzaren panoraman, bertan ematen den diru-kopuruagatik ezeze euskararen produkzio urrian egile batzuentzat garrantzizko bultzada izan daitekeelako. Iazko edizioaren sari nagusia Asier Martínez de la Peraren etxera joan zen “Sineskeriak” lanagatik,  2011an berriz, Alai Zubimendi eraman zuen saria (“Harri baten boterea”). Euskal komikigintzan egindako ibilbideagatik “Ohorezko sari” batzuk ere urtero banatzen dituzte eta orain arteko edizioetan Xabiroi (2011) aldizkaria eta Jon Zabaleta (2012) suertatu dira irabazle.

© Deia  
Jon Zabaleta

Lanak aurkezteko epea aste batekoa izango da, irailaren 9tik 15erarte. Eskuan zein postaz entregatu ahal izango dira, kasu honetan helbide honetara bidaliz:

III. Rekalde-Ortzadar Komiki Lehiaketa

Iparraguirre Editoriala, S.A.

Kaputxinoen bidea, 6, 5.C

Bilbao-Bizkaia (48013)

Lehiaketaren oinarriak hemen klikatuz irakur ditzakezu.

Komiki kuttunenak Arrasatetik

“Komikiaren kalitatea  ezin da zerrenda batera mugatu” azaltzen du Antonio Altarribak Arrasateko Udal Bibliotekaren bultzadaz argitataratu berri den Komiki Gidaren aurkezpenean.  Komiki Gidaren aurkezpena Arrasateko Jokin Zaitegi aretoan egin zuten pasadan astean Altarriba eta Kim egileek . Arrazoia dauka Antoniok, horregatik berak koordinatu duen liburuxka honetara,  adin eta era askotako aditu gonbidatu ditu. Hamar guztira, bakoitzak bere hamar komiki kuttunenak aukera ditzan. Horrela, zerrenda mugatu bat baino, emaitza 100 titulu inguruko proposamen ireki eta zabala dugu, hori baita Komiki Gida.

Entsegu interesgarri honetara hurbildu diren gonbidatuak hauek izan dira : Borja Crespo, J.M. Díaz de Guereñu, Mauro Entrialgo, Igor Leturia, Lola Lorente, Joaquín Reyes, Laura Pérez-Vernetti, Fernando Tarancón, Zaldieroa eta Alfonso Zapico. Aukeratutakoen tbo rankingean zerrenda-buru Maus bezalako “klasikoak” ditugu, horren ezagunak ez diren beste titulu batzuen parean (Maakies adibidez…). Komiki berri eta komiki zahar… denetarik.  Zaharren artean adibidez, aurrez-aurre, urte berean (1929an) sortutako bi pertsonai, Tintin, kazetari txukuna, politikoki zuzena (edo geroago  ikusi den bezala ez horren zuzena)… eta Mauro Entrialgok aukeratu

eta ederto definitu duen Popeye,  bere familia traketsarekin. Horra hor XX. mende hasieratik datozen komiki tradizio antagoniko bi: Tintinismoa versus Popeyismoa. Irudi garbiaren joera versus marrazki “itsusiaren” eredua.

Euskarazko lanei dagokienez… gehiegirik ezin dugu esan, ia agertzen ez direlako, egia esan,  alde batetik ezaguna dugulako euskal komikigintzaren ahulezia, bai, baina baita aukeratutako aditu gehienek gaztelerazko komiki merkatua dutelako erreferente nagusitzat. Salbuespenak salbuespen hor ditugu Gartxot edo Pololoak bere ondo merezitako lekua  betetzen.

(Hutsunearen aitzakia erabilita, Komikeritik, eta inork eskatu barik, zerrendetako goiko postuetarako euskal titulu bat proposatzeko ausardia izango dugu… hemen doa: Ereinek 1985. urtean argitaratu zuen Antton Olariagaren “Hamaseigarrenean aidanez”, gaur horren modan dagoen Eleberri Grafikoaren euskal aurrekari bikaina).

Komikigintzaren ikuspegi orokorrago baten alde  Komiki Gida pauso polita da, aurretik euskal liburutegietatik egindako beste lan batzuekin osatu daitekeena (adibidez Donostiako liburutegiek 10komik argitaratu zuten 2011 urtean edo Arrasatetik ere  iaz osatu zutena: “Komikia eta Zinema”). Beraz, artikulua bukatu behar dugu, derrigorrez, euskal liburutegietara begira. Arrasateko biblioteka aldera, komikizaletasuna hedatzeko egiten duten lana goraipatu eta eskertzeko.  Eskerrik asko zuei!